ស្ដ្រីម្នាក់ដេកឱបប្ដីមួយយប់អត់ដឹងថាប្ដីគាំងបេះដូងស្លាប់
29-December-2015 | ដោយ មួយឡា
ភ្នំពេញ៖ ប្រភពព័ត៌មានពីនគរបាលប៉ុស្តិ៍មានជ័យបានឲ្យដឹងថា នៅវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី២៨ ខែធ្នូ ឆ្នាំ២០១៥ ប្រជាពលរដ្ឋនាំគ្នាភ្ញាក់ផ្អើលដោយសារតែឮសំឡេងស្ត្រីម្នាក់ស្រែកទ្រហោយំឲ្យអ្នកភូមិជួយសង្គ្រោះប្តីរបស់ខ្លួន ដែលផុតដង្ហើមបាត់ទៅហើយ ដោយសារគាំងបេះដូង។ ហេតុការណ៍ខាងលើបានកើតឡើងនៅចំណុចក្រុមទី១០ ភូមិទ្រា សង្កាត់ស្ទឺងមានជ័យ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីលោកស្រីឈ្មោះ អ៊ុក សុផា អាយុ២៦ឆ្នាំ ជាភរិយា បានឲ្យដឹងថា ប្តីរបស់ខ្លួនដែលបានស្លាប់ឈ្មោះ ម៉ៅ សំអឿន អាយុ២២ឆ្នាំ មានស្រុកកំណើតនៅភូមិព្រែកអន្ទះ ឃុំព្រែកអន្ទះ ស្រុកពោធិ៍រៀង ខេត្តព្រៃវែង ហើយពួកគេទាំង២បានមកជួលផ្ទះស្នាក់នៅក្នុងភូមិកើតហេតុខាងលើដើម្បីមកបម្រើការងារជាកម្មករសំណង់។
លោកស្រីបានបន្តឲ្យដឹងថា នៅល្ងាចថ្ងៃទី២៧ ខែធ្នូ ឆ្នាំ២០១៥ ប្តីរបស់គាត់បានចេញពីធ្វើសំណង់មកផ្ទះជួលហើយហូបបាយជាមួយប្រពន្ធ និងកូនស្រីតូចជាធម្មតាដោយបានត្អូញត្អែរ ឬមានជំងឺប្រចាំកាយអ្វីឡើយ។ ក្រោយពេលបាយនៅវេលាម៉ោង៧យប់ពួកគេចូលគេងធម្មតាលុះដល់ម៉ោង១២និង៣០នាទីរំលងអធ្រាត្រឈានចូលថ្ងៃទី២៨ នៅពេលដែលខ្លួន (ប្រពន្ធជនរងគ្រោះ) ដែលដេកនៅក្បែរមិនឮសំឡេងប្តីដកដង្ហើមនឹកឆ្ងល់ក៏បើកភ្លើងមើលក៏ស្រាប់តែដឹងថា ប្តីរបស់ខ្លួនផុតដង្ហើមបាត់ទៅហើយក៏បានស្រែកហៅអ្នករស់នៅក្បែរនោះឲ្យជួយសង្គ្រោះប្តីរបស់ខ្លួន នាំយកទៅមន្ទីរពេទ្យ ប៉ុន្តែត្រូវបានអ្នកជិតខាងប្រាប់ថាប្តីរបស់នាងស្លាប់បាត់ទៅហើយ។
សមត្ថកិច្ចដែលចុះទៅពិនិត្យសាកសពបាននិយាយថាជនរងគ្រោះពិតជាស្លាប់ដោយជំងឺគាំងបេះដូង ព្រោះភរិយារបស់សពបានបំភ្លឺប្រាប់សមត្ថកិច្ចថាប្តីរបស់ខ្លួនច្រើនត្អូញត្អែរពីការថប់ដង្ហើមហើយនៅលើខ្លួនប្រាណជនរងគ្រោះពុំមានស្លាកស្នាមអ្វីដែលសន្និដ្ឋានថាជាអំពើឃាតកម្មនោះឡើយ។ បន្ទាប់ពីពិនិត្យរួចរាល់ហើយក្រុមគ្រួសាររបស់ជនរងគ្រោះបានសម្រេចចិត្តដឹកសពយកទៅធ្វើបុណ្យនៅឯស្រុកកំណើត៕ ដោយ មែនកំ សត់
ចំនួនអ្នកទស្សនា
- ថ្ងៃនេះ3911
- ម្សិលមិញ14181
- សប្តាហ៍នេះ3911
- ខែនេះ119061
- ឆ្នាំនេះ119061
- សរុប20561517